काठमाडौँ पुस १७ ।। गत पुस ११ गते नेकपा एमालेबाट निकालिएका नेता डा. भीमबहादुर रावलले नयाँ वैकल्पिक राजनीतिक शक्ति निर्माणको घोषणा गरेका छन् ।
बुधबार काठमाडौंमा आयोजित पत्रकार सम्मेलनमार्फत् उनले यस्तो घोषणा गरेका हुन् ।
‘…यस्ता मान्यताहरूको आधारमा देश र जनतासँग सम्बन्धित समग्र विचार, कार्यक्रम र नीति तय गर्दै, देश र प्रवासमा अभियान सञ्चालन गर्दै, देशभक्तिपूर्ण वैकल्पिक राजनीतिक शक्तिको निर्माण अपरिहार्य बनेको छ’, उनले पत्रकार सम्मेलनमा भने, ‘यसैतर्फ हाम्रा पाइला र प्रयासहरू अगाडि बढ्ने छन् । हाम्रा यी पाइला र प्रयासहरू अगाडि बढ्ने सन्दर्भमा विभिन्न संगठित रुपमा रहनुभएकासँग सहकार्य हुन सक्छ ।’
उनले सम्बोधनका क्रममा बीपी कांग्रेस, पूर्व देशभक्त सैनिक संगठनसहितलाई एक ठाउँमा राखेर नयाँ पुस्ताको जीवन सुरक्षित बनाउन लागेको पनि बताएका छन् । उनले देशभक्तहरू सबैको सम्मान गर्ने पनि बताए । रावलले वैकल्पिक शक्ति निर्माणका लागि मातृभूमि जागरण अभियान सञ्चालन गर्ने पनि बताएका छन् ।
‘भ्रष्टाचार कुशासन, स्वेच्छाचारी क्रियाकलापविरुद्ध जनतालाई सजग र क्रियाशील बनाउनुपर्छ । राजनीति, दल, विचार र संगठन देश र जनताको सेवा एवम् हितको लागि हो भन्ने मान्यतालाई स्थापित गर्नुपर्छ’, उनले भने, ‘मातृभूमि अभियान सञ्चालन गरि देश र जनताको हितका लागि सबै देशभक्त इमान्दार शक्ति, व्यक्ति, समुदायलाई एकतावद्ध गर्नुपर्छ ।’
उनले पत्रकार सम्मेलनका क्रममा देश र जनताले भोगिरहेका समस्या समाधानका चुनौतीको सामना गर्दै स्वाधीन, स्वतन्त्र र स्वाभिमानी नेपाललाई पुनर्जागरणको दिशामा अगाडि बढाउनने बताए ।
‘स्वदेश र प्रवासमा रहेका नेपालीहरूको आवाज, आकांक्षा र आवश्यकतालाई गहिरो गरी मनन् र विश्लेषण गर्दै राज्य राजनीतिलाई त्यसको सोवमा समर्पित गर्नुपर्छ’, उनले भने, ‘देशको जनशक्ति र प्रकृतिक स्रोत सर्वप्रथम देशको सर्वोपरि हितमा परिचालित र उपयोग हुनुपर्ने कुरालाई नीति, निर्णयमा स्थापित गर्नुपर्छ ।’
रावलले राजनीति, राजनीतिक दल, सिद्धान्त सबै देशको सर्वोपरि हित पूरा गर्न माध्यम र साधनमात्रै हुने बताए । ‘देश सबैभन्दा माथि हुन्छ भन्ने धारणालाई बलियो गरी अबलम्बन् गर्नुपर्छ । राजनीतिक दल र राज्यका सबै अवयव् र संयन्त्रहरू राष्ट्रिय हित, जनताको समृद्धि र कल्याणमा केन्द्रित परिचालित र सञ्चालित हुनुपर्छ’, रावलले थपे, ‘यसका लागि विधि, पद्धति, प्रणाली र सुशासनको बाटोम निस्वार्थ रुपमा दृढताका साथ अगाडि बढ्नुपर्छ ।’