देउमाई नगरपालिका वडा नम्बर ४ भानुभक्त माविको छात्रावास खेलमैदानमा आज भएको निकै नै प्रतिस्पर्धात्मक खेलको पहिलो हाफमा दुवै टिमले पाएका अवसरहरुलाई सदुपयोग गर्न नसक्दा गोलरहित बराबरीमा सकिएको थियो।
दोस्रो हाफमा गोल गर्ने लक्ष्य सहित दुवै टिम मैदान प्रवेश गरे। पहिलो हाफको तुलनामा सुधारिएको प्रदर्शन गर्दै वडा नम्बर ४ ले वडा नम्बर १ लाई दबाबमा राख्दै बल पोजिसन आफ्नो पकडमा राख्न सफल भयो। फलस्वरूप वार्ड नं ४ का जर्सी नम्बर ७ सुशील बेघाले डिबक्स नजिकैबाट गरेको प्रहारले जाली चुमेसँगै वडा नम्बर ४ ले खेलमा अग्रता बनायो। त्यसपछि पनि लगातार आक्रमण गर्दै वडा नम्बर १ को डिबक्समा अधिकांश बल पोजिसन राखेको वडा नम्बर ३ ले प्रहार भने गर्न सकिरहेको थिएन। तर डिबक्समा आएको बललाई क्लियर गर्ने क्रममा वडा नम्बर १ का क्याप्टेन सुरज राईको प्रहार आफ्नै पोस्टमा गोल हुन पुग्दा उपहार गोलबाट वडा नम्बर ४ ले अग्रतालाई दोब्बर बनायो।
दुई सुन्यो गोलले पछि परेको अवस्थामा वडा नम्बर १ ले त्यसपछि भने वडा नम्बर ४ लाई दबाबमा राख्दै बारम्बार अवसर बनाइरह्यो। तर पाएका अवसरलाई सदुपयोग गर्न नसक्दा हार बेहोर्दै वडा नम्बर १ सेमिफाइनल बाट घर फर्किएको छ
आजको खेलमा उत्कृष्ट प्रदर्शन गर्दै आफ्नो टिमलाई फाइनल पुर्याउन सफल विजेता टिमका जर्सी नम्बर ७ का सुशील राई म्यान अफ द म्याच बन्दै नगद १००० र ट्रफी प्राप्त गरे उनलाई तरुण दल देउमाई नगर समिति अध्यक्ष बिमलकाजी खम्बु र अग्रज राजनीतिज्ञ मोती साम्पाङले नगद तथा ट्रफी प्रदान गरे।
हाम्रो गोल लागू औषध विरुद्धको बोल भन्ने मुख्य नाराका साथ स्थानीय स्तरमा रहेका खेलाडीहरूलाई उजागर गर्ने र खेलकुदको माध्यमबाट युवाहरूलाई सही मार्ग निर्देशनमा डोर्याउने उद्देश्य सहित नेपाल तरुण दल देउमाई नगर कमिटीले प्रतियोगिता आयोजना गरेको हो। पौष ६ गतेबाट सञ्चालित तियोगिताको फाइनल खेल पौष १२ गते शनिबार दिनको ठीक १ बजे हुनेछ ।
प्रतियोगिताको विजेता टिमले नगद ६० हजारसहित आकर्षक ट्रफी मेडल र प्रमाणपत्र प्राप्त गर्नेछन्। त्यस्तै उपविजेता टिमले नगद ३५ हजार ट्रफी मेडल र प्रमाणपत्र प्राप्त गर्नेछन् । विधागत उत्कृष्ट खेलाडीहरुलाई पनि ट्रफी र नगद पुरस्कार प्रदान गरिने आयोजक समितिका सचिव विनम ढकालले जानकारी दिए।
