बिर्तामोड वैशाख २५।। झापाको बिर्तामोडमा वडास्तरीय प्रथम उपमेयर कप भलिबल प्रतियोगिता आयोजना हुने भएको छ।
बिर्तामोड ९ नम्बर वडा खेलकुद विकास समितिको आयोजना र नगर खेलकुद विकास समितिको सहआयोजनामा यही जेठ ३ र ४ गते बिर्तामोड ९ गरामनी स्थित दुर्गा माविको खेलमैदानमा प्रतियोगिता आयोजना हुने भएको हो।
नेपालको राष्ट्रिय खेल भलिबलको प्रवर्द्धन गर्ने र स्थानीय स्तरमा रहेका भलिबल खेलाडीहरूलाई प्रोत्साहन गर्दै अगाडि बढाउने उद्देश्यका साथ नगर खेलकुद विकास समितिले यो प्रतियोगिता आयोजना गर्न लागेको वार्ड नं ९ खेलकुद विकास समितिका अध्यक्ष तथा प्रतियोगिता संयोजक विश्वदिप राजवंशीले जानकारी दिए।
प्रतियोगितामा बिर्तामोड नगरपालिकाका १०वटै वडाहरूको सहभागिता रहने छ । हरेक टिमबाट वडा भन्दा बाहिरका दुई जना बाहिरी खेलाडी समेत खेलाउन सकिने प्रावधान रहेको संयोजक राजवंशीले जानकारी दिए
प्रतियोगिताको तयारी अन्तिम चरणमा पुगेको जानकारी दिँदै राजबंशीले नेपालको राष्ट्रिय खेल भलिबललाई प्रवर्द्धन गर्दै अगाडि बढ्नकालागि र प्रतियोगितामा साथ सहयोग दिँदै सफल बनाउन सम्पूर्ण नगरबासीलाई अनुरोध समेत गरेका छन्।
प्रतियोगिताको विजेताले नगद रु. १ लाख एक सय रुपैयाँ र उपविजेताले नगद ५१ हजार एक सय ट्रफी मेडल र प्रमाणपत्र प्राप्त गर्नेछन्। साथै विधागत उत्कृष्ट खेलाडीहरुलाई पनि नगद तथा ट्रफी प्रदान गरिने आयोजकले जानकारी दिएको छ