इलाम कार्तिक १० इलामको माई जोगमाई ५ सोयाङ लोकसाङमा जारी तेस्रो श्री परोपकार सामुदायिक गोल्डकप फुटबल प्रतियोगिताको सेमिफाइनल समीकरण पूरा भएको छ ।
हिजो भएका दुई क्वाटर फाइनलबाट रेड डेभिल्स ए र टप सेभेन एफसी अन्तिम चारमा प्रवेश गरेसँगै सेमीफाइनल सेमीकरण पूरा भएको हो।
त्यसअघि शनिबार भएको दुई क्वाटर फाइनलबाट रेड डेभील्स बी र लोक्साङ फुटबल क्लब अन्तिम चारमा प्रवेश गरिसकेका छन्।
शनिबार भएको पहिलो क्वाटरफाइनल खेलमा रेड डेभिल्स बि ले पूर्व क्षितिज एलाई पराजित गर्दै अन्तिम चारको यात्रा तय गरेको हो। सोही दिन भएको दोस्रो क्वार्टर फाइनल खेलमा लोक्साङ एफसीले युवाशक्ति एफसीलाई पराजित गर्दै अन्तिम चारको यात्रा तय गरेको छ।
आजबाट सेमिफाइनलका खेलहरू सुरु हुनेछन्। आज हुने पहिलो सेमिफाइनल खेलमा रेड डेभील्स बीले लोक्साङ एफसीसँग प्रतिस्पर्धा गर्नेछ। त्यसैगरी आजनै हुने दोस्रो सेमिफाइनल खेलमा रेड डेभील्स एले टप सेभेन एफसीसँग फाइनल प्रवेशका लागि प्रतिस्पर्धा गर्नेछ।
स्थानीय स्तरमा रहेका फुटबल खेलाडीहरूलाई उजागर गर्ने र गाउँ गाउँबाट फुटबल खेल विकासको लक्ष्य सहित प्रतियोगिता आयोजना गरिएको आयोजक समितिका अध्यक्ष गजेन्द्र ताम्लिङ लिम्बुले जानकारी दिनुभएको छ।
कार्तिक ३ गतेबाट सुरु भएको गोल्डकपको फाइनल खेल कार्तिक ११ गते हुनेछ। विजेताले नगद ७१ हजार ट्रफी मेडल र प्रमाणपत्र प्राप्त गर्नेछन्। उपविजेता टोलीले नगद ५१ हजार ट्रफी मेडल र प्रमाणपत्रमा चित्त बुझाउनेछन् ।त्यसैगरी विधागत उत्कृष्ट खेलाडीहरुलाई पनि ट्रफी प्रदान गरिने समितिका कोषाध्यक्ष झलक सिंह ताम्लिङ लिम्बुले जानकारी दिनुभएको छ।
