बिर्तामोड । केही दिन अघि साइबर अपराध सम्बन्धी मुद्दामा पक्राउ परेका एण्ड सी मेडिकल कलेजका सञ्चालक तथा राष्ट्र, राष्ट्रियता, धर्म संस्कृति र नागरिक बचाउ महाअभियानका संयोजक दुर्गा प्रसाईं रिहा भएका छन् ।
मंगलबार बेलुका जिल्ला अदालत काठमाडौँले माग गरेको १ लाख रुपैयाँ धरौटी बुझाएर उनी रिहा भएका हुन् । मंगलबार नै काठमाडौँ जिल्ला अदालतका न्यायाधीश ठाकुरप्रसाद खरेलले उनीसँग दुईवटा मुद्दामा जनही ५०–५० हजार धरौटी माग गरेका थिए ।
प्रहरीको साइबर ब्युरोले उनलाई असोज ६ मा भक्तपुरस्थित घरबाट पक्राउ गरेको थियो । सरकारी वकिल कार्यालय काठमाडौँले उनीविरुद्ध विद्युतीय अपराधसम्बन्धी दुईवटा मुद्दा दायर गरेको थियो ।
युट्युब च्यानल ‘देश दुनियाँ खबर’ मा प्रसाईंले राष्ट्रिय स्वतन्त्र पार्टीमा आबद्ध एकजना महिलाको ‘चरित्रहत्या गरेको’ आरोप छ । अर्का एकजना पुरुषले पनि प्रसाईंविरुद्ध जाहेरी दिएका थिए । यसैबीच, बिर्तामोडमा प्रसाईं रिहाइको खुसियालीमा र्याली निकालेको छ ।