पाँचथर पुस १२।। झापाकपको उपाधि जितेको एक साता न भाबित्दै चर्च ब्वाइज क्लब पाँचथरको फिदिममा जारी ११औँ फाल्गुनन्द गोल्डकपको फाइनलमा प्रवेश गरेको छ ।
शुक्रबार भएको पहिलो सेमिफाइनलमा आयोजक फिदिम स्पोर्टिङ क्लबलाई ३-१ गोलअन्तरले पराजित गर्दै चर्च ब्वाइज उपाधि नजिक पुगेको हो । खेलमा सुरुवाती अग्रता भने आयोजक फिदिम स्पोर्टिङ क्लबले लिएको थियो ।
खेलको ४३औँ मिनेटमा दिनेश शेर्माले गोल गर्दै फिदिम स्पोर्टिङलाई सुरुवाती अग्रता दिलाएका थिए । तर, आयोजक क्लबले अग्रतालाई धेरै समय टिकाउन सकेन । पहिलो हाफको इन्जुरी समयको तेस्रो मिनेटमा चर्च ब्वाइजका समिर तामाङले गोल गर्दै खेल १-१ गोलको बराबरीमा ल्याएका थिए ।
पहिलो हाफ १-१ गोलको बराबरीमा सकिएको खेलको दोस्रो हाफमा चर्च ब्वाइजले थप दुई गोल गरेको थियो । खेलको ६२औँ मिनेटमा अर्मान्ड बेडुमले गोल गर्दै चर्च ब्वाइजलाई २-१ को अग्रता दिलाए ।
त्यसपछि खेलको ८४औँ मिनेटमा फोफोना अबयोमीले गोल गरेपछि चर्च ब्वाइज आयोजक फिदिम स्पोर्टिङ क्लबमाथि ३-१ गोलअन्तरको जित निकाल्न सफल भएको हो । खेलमा म्यान अफ दी म्यान चर्च ब्वाइजका फोफोना घोषित भए ।
चर्च ब्वाइजले अब उपाधिका लागि मच्छिन्द्र फुटबल क्लब र न्युरोड टिम एनआरटीबीचको विजेताको खेल्ने छ । दोस्रो सेमिफाइनलमा शनिबार मच्छिन्द्र फुटबल क्लब र एनआरटीबीच प्रतिस्पर्धा हुनेछ । प्रतियोगिताको उपाधि विजेता टिमले १० लाख ५ सय ५५ रुपैयाँ र उपविजेताले ५ लाख ५५ हजार ५ सय ५५ रुपैयाँ पाउने छ ।