दुबई । सुखको खोजीमा परदेशिएका नेपालीका कथामा केवल उज्यालो पक्ष मात्रै हुँदैन। घरपरिवारको जिम्मेवारी, गरिबीको बाध्यता, विदेश जान लिएको ऋण, चर्को ब्याज र समयमै ऋण तिर्न नसक्दा भोग्नुपर्ने दबाब—यी सबै पीडा बोकेर हजारौँ नेपाली परदेशमा पसिना बगाइरहेका छन्। यही यथार्थ र प्रवासी नेपालीको मनोभावलाई सांगीतिक रूपमा प्रस्तुत गर्दै दुबईबाट नेपाली म्युजिक भिडियो ‘फर्सी कुइए झै’ सार्वजनिक भएको छ।
नेपालमा अवसरको अभाव र आर्थिक कठिनाइका कारण विदेशिन बाध्य नेपालीको कथालाई गीतले भावनात्मक रूपमा उठाएको छ। परिवारको भविष्य राम्रो बनाउने सपना बोकेर ऋण काढेर परदेश पुगेपछि सुरु हुने संघर्ष, कमाइले ऋण धान्न नसक्ने अवस्था, घरबाट आउने अपेक्षा र साहुको ताकेताबीचको मानसिक दबाब गीतको भावनामा प्रतिविम्बित हुन्छ।
परदेशमा पुगेपछि पैसा कमाएर घर फर्किने सपना देख्ने नेपालीका लागि वास्तविकता भने धेरैपटक त्यति सहज हुँदैन। ऋणको बोझ, परिवारको चिन्ता र आफ्नो दुःख लुकाएर घरमा सुखको खबर सुनाउनुपर्ने बाध्यताबीच उनीहरूले बिताउने दिनलाई ‘फर्सी कुइए झै’ ले संगीतको माध्यमबाट अभिव्यक्त गर्ने प्रयास गरेको छ।
यो गीत केवल मनोरञ्जनका लागि तयार गरिएको सिर्जना नभई परदेशिएका नेपालीको भोगाइ, पीडा र मातृभूमिप्रतिको गहिरो सम्बन्धलाई उजागर गर्ने सांगीतिक कथाका रूपमा आएको छ। विदेशी भूमिमा रहेर पनि नेपाली गीत–संगीतप्रतिको माया र आफ्नो माटोसँगको भावनात्मक सम्बन्धलाई कलाकारहरूले सिर्जनामार्फत जोड्ने प्रयास गरेका छन्।
रन्जित रिजाल र सरिता अधिकारीको मुख्य अभिनय रहेको भिडियोमा आशिष पुरुष, विकास तिवारी, ज्याक जङ्ग थापा लगायतका कलाकारको अभिनय छ। दुबईका विभिन्न स्थानमा छायांकन गरिएको भिडियोले एकातर्फ प्रवासको परिवेश देखाउँछ भने अर्कोतर्फ त्यही परिवेशभित्र संघर्ष गरिरहेका नेपालीको भावनालाई प्रस्तुत गर्छ।
गीतमा पाकिस्तानी गायक आतिफ असलमको स्वरमा नेपाली गीत प्रस्तुत गरिएको छ भने गायनमा बिना घले नेपालीको समेत सहभागिता छ। पदम बिसीको संगीत तथा नेत्र लम्सालको शब्द रहेको गीतलाई सञ्जय शिर्पालीले एरेन्ज तथा कम्पोज गरेका हुन्। लाम प्रोडक्सन स्टुडियोमा रेकर्ड गरिएको गीतको मिक्सिङ तथा मास्टरिङ पनि शिर्पालीले गरेका छन्।
पेरेनिप मोशन पिक्चर्स प्राइभेट लिमिटेडको प्रस्तुतिमा तयार भएको भिडियोको निर्देशन नरेशले गरेका हुन्। नविन कुमारको सिनेमाटोग्राफी, इलियास शेखको सम्पादन तथा विकास तिवारीको निर्माण रहेको छ। ग्राफिक तथा प्रमोशनल डिजाइन सरोज अधिकारीले गरेका छन्।
विदेशमा बसेर नेपाली कला, संस्कृति र संगीतलाई निरन्तरता दिनु आफैँमा एउटा सांस्कृतिक अभियानजस्तै बनेको छ। आफ्नो परिवारको आर्थिक अवस्था सुधार्ने उद्देश्यले परदेशिएका नेपालीहरू रोजगारीसँगै गीत, संगीत, साहित्य र कलामार्फत आफ्नो पहिचान पनि जोगाइरहेका छन्। ‘फर्सी कुइए झै’ त्यही प्रवासी नेपाली मनको प्रतिनिधि आवाज बन्न खोजेको छ।
नेपालबाट हजारौँ किलोमिटर टाढा रहे पनि नेपाली गीत सुन्दा आफ्नै गाउँ, घर, परिवार र माटो सम्झिने प्रवासी नेपालीका लागि यो सिर्जना अझ आत्मीय बन्न सक्ने देखिन्छ। ऋणको बोझदेखि परिवारको सम्झना र संघर्षका बीच पनि नेपालीपनलाई जोगाइराख्ने प्रयासले गीतलाई केवल एउटा भिडियोभन्दा माथि उठाएर प्रवासी नेपाली जीवनको भावनात्मक दस्तावेज बनाउने प्रयास गरेको छ।
परदेशले शरीरलाई टाढा पुर्याए पनि मन भने आफ्नै देशमा रहने नेपालीको यही भावनालाई बोकेको ‘फर्सी कुइए झै’ ले विदेशमा रहेका नेपाली सर्जकको सिर्जनशीलता र नेपाली संगीतप्रतिको निरन्तर प्रेमलाई समेत उजागर गरेको छ।
गीत हेर्नका लागि तलको लिङ्कलाई