बिर्तामोड चैत्र १२ ।। झापाको कनकाईमा आज एकाबिहानै श्रीमानले श्रीमतीको धारिलो हतियार प्रहार गरी हत्या गरेर आफूले पनि आत्महत्याको प्रयास गरेका छन्। उनी घाँटी काटिएर बेहोश अवस्थामा भेटिएका छन् ।
कनकाई-५ नारायणदल चोकमा डेरामा बस्दै आएका दम्पत्तीमध्ये पत्नीको वीभत्स हत्या भएको र पतिको घाँटी आधा काटिएको अवस्थामा भेटिएको वडा अध्यक्ष कृष्णबहादुर राईले बताए ।
पति अन्दाजी ४२ वर्षीय लालबहादुर मंग्रातीले मादक पदार्थको जोशमा आफूले आफ्नी पत्नी अन्दाजी ४० वर्षीया मनिषा मंग्रातीको हतियार प्रहार गरी हत्या गरेको स्वीकारेको प्रहरीसमक्ष बताएका छन् ।
उनले आज बिहान ०४ः३८ बजे स्थानीयबासीलाई खबर गरेर आफूले पत्नीको हत्या गरेको जानकारी दिएको बताइएको छ । उनलाई उपचारका लागि बिएन्डसी अस्पताल ल्याइएको छ ।
स्थानीयले जानकारी गराएपछि जनप्रतिनिधिहरु घटनास्थल पुगेका थिए । जनप्रतिनिधि र गाउँलेले ज्याला मजदुरी गर्दै आएका उनीहरु मादर्थ पदार्थ सेवन गर्ने र बेलाबेला झगडा गरिरहने बताए ।
स्थानीयबासीका अनुसार घटना बिहान ३ बजेतिर भएको हो । ताप्लेजुङ सिनाम घर भएका उनीहरु त्यहाँ दुई वर्षदेखि स्थानीय योगेन्द्र बस्यालको घरमा डेरामा बस्दै आएका थिए । उनीहरु हिजो दिनभर मजदुरी गर्न गएको गाउँलेले बताए ।
