झापा साउन १९ ।। पाँचथरको याङवरक गाउँपालिका–१ च्याङथापुस्थित बिरुवा गाउँमा गत शुक्रबारदेखि बेपत्ता भएका दुई बालबालिकाको शव खोलामा मृत अवस्थामा फेला परेको छ।
बुधबार बिहान ६ वर्षीया नमुना राई र उनका दाजु ९ वर्षीय शिशिर राईको शव बिरुवा खोलामा फेला परेको इलाका प्रहरी कार्यालय च्याङथापुका प्रमुख भीम थेवेले जानकारी दिए।
स्थानीयवासीले बिहान नमुनाको शव फेला पारेपछि प्रहरीलाई खबर गरेका थिए। त्यसपछि खोजी गर्ने क्रममा उनका दाजु शिशिरको शव पनि सोही खोलामा करिब २०० मिटर तल फेला परेको हो।
गत शुक्रबार बिहान विद्यालय जान घरबाट निस्किएका दुवै जना त्यसपछि सम्पर्कविहीन थिए। उनीहरू स्थानीय बिर्ख बहादुर राईका सन्तान हुन्। उनीहरूले पढ्ने पूर्ण आधारभूत विद्यालय घरबाट करिब १५ मिनेट उकालोमा रहेको बताइएको छ।
घटनाबारे थप अनुसन्धान भइरहेको जिल्ला प्रहरी कार्यालय पाँचथरले जनाएको छ। विस्तृत विवरण आउन बाँकी छ।
