बिर्तामोड मंसिर ५।। अर्जुनधारा नगर खेलकुद विकास समितिको आयोजनामा झापाको अर्जुनधारामा राष्ट्रिय स्तरको अर्जुनधारा महिला खुला भलिबल प्रतियोगिता हुुने भएको छ ।
आयोजक अर्जुनधारा नगर खेलकुद विकास समितिले आज खेलमैदान लक्ष्मी माविमा पत्रकार सम्मेलन गरेर प्रतियोगिताबारे जानकारी दिएको हो । प्रतियोगिता यही मंसिर १७ गतेदेखि २१ गतेसम्म सञ्चनलन हुने प्रतियोगिताका सल्लाहकार वीरबहादुर राईले जानकारी दिए ।
प्रतियोगितामा तीन विभागीय नेपाल एपिएफ, नेपाल पुलिस, त्रिभुवन आर्मी सहित न्यु डायमन्ड, एभरेस्ट भलिबल क्लब र कोशी प्रदेश टिमको सहभागिता रहनेछ। प्रतियोगिता लिग नकआउट का आधारमा सञ्चालन हुनेछ।
प्रतियोगिताको विजेताले नगद २ लाख, उपविजेताले १ लाख र तेस्रो हुने दुई टिमले नगद ३० हजार ट्रफी मेडल र प्रमाणपत्र प्राप्त गर्नेछन्। । त्यस्तै, सर्वोत्कृष्ट खेलाडीले १५ हजार पाउँदा, प्रत्येक दिनको प्लेयर अफ द म्याचले नगद पाँच हजार र ट्रफी पाउने छन् ।
त्यस्तै, बेस्ट स्पाइकर, बेस्ट ब्लकर, बेस्ट सर्भर, बेस्ट सेटर र बेस्ट लिबेरोले नगद १० हजार र ट्रफी प्राप्त गर्ने सल्लाहकार राईले जानकारी दिए। प्रतियोगिता सम्पन्न गर्न २७ लाख ६५ हजार रुपैयाँ खर्च हुने आयोजकले अनुमान गरेको छ ।
पत्रकार सम्मेलनमा अर्जुनधारा नगरपालिकाका नगरप्रमुख बलदेव सिंह गोमदेन, झापा गोल्डकपका अध्यक्ष केदार गिरी, नेपाल भलिबल सङ्घका उपाध्यक्ष मदन खड्का , अर्जुनधारा नगरपालिका वडा नं ६ का वडा अध्यक्ष हरिश्चन्द्र बास्तोला, अर्जुनधारा नगर खेलकुद विकास समितिका अध्यक्ष सुरेन्द्र धिमाल प्रतियोगिता संयोजक प्रभा कामबाङ झापा भलिबल सङ्घका महासचिव खडानन्द खतिवडा , आर्थिक संयोजक नन्दहाङ नेम्बाङ, सहसंयोजक विशाल लिम्बु लक्ष्मी माध्यमिक विद्यालयका प्रधानाध्यापक निर्मला पोखरेल लगायतको आतिथ्यता रहेको थियो।
लक्ष्मी माध्यमिक विद्यालय सहआयोजक रहेको प्रतियोगिता सोही विद्यालय को प्राङ्गणमा अर्जुन धारा ६ मा सञ्चालन हुनेछ।