माई मंसिर २७।। झापाको शनिश्चरे फुटबल क्लब अर्जुनधारा र इलामको लक्ष्मीपुर एफसी दोस्रो गरुवा कप फुटबल प्रतियोगिताको उपाधिका लागि भिड्ने भएका छन्।
इलामको माई नगरपालिका ४ दानाबारीस्थित शुक्रबारे खेलमैदानमा आजको पहिलो सेमिफाइनल खेलमा आयोजक नमुना युथ क्लबलाई २–० गोल अन्तरले पराजित गर्दै लक्ष्मीपुर एफसी इलाम फाइनल प्रवेश गरेको हो। निकै नै प्रतिस्पर्धात्मक बनेको खेलमा स्टार खेलाडीहरूका साथ मैदान उत्रिएको आयोजकलाई स्तब्ध पार्दै लक्ष्मीपुर एफसी फाइनल प्रवेश गरेको हो। आशिष चापागाईं, रोमन योगी ,विनोद धमला, जस्ता चर्चित तथा अनुभवी खेलाडीका साथ मैदान उत्रिएको आयोजकले पाएका अवसरलाई सदुपयोग गर्न नसक्दा सेमिफाइनलबाट बाहिरिएको छ
त्यस्तै आज भएको दोस्रो सेमी फाइनल खेलमा ह्याप्पी ड्रिम्स चेप्टीलाई चार एक गोल अन्तरले पराजित गर्दै शनिश्चरे एफसी फाइनल प्रवेश गरेको हो। शनिश्चररे एफसीका लागि श्याम मुर्मुले दुई निमा तामाङ र सौरभ लिम्बुले एक एक गोल गरे। सुनिश्चरे एफ सी अब उपाधिका लागि लक्ष्मीपुर एफसी इलामसँग प्रतिस्पर्धा गर्नेछ।
नमुना युथ क्लबले आयोजना गरेको प्रतियोगितामा इलाम, झापा, मोरङ र सुनसरीका गरी उत्कृष्ट १६ वटा टिमहरूको सहभागिता रहेको थियो। फाइनल खेल पर्सी मङ्सिर २९ गते हुनेछ। प्रतियोगिताको विजेताले नगद रु. १ लाख रुपैयाँ ट्रफी मेडल र प्रमाणपत्र प्राप्त गर्नेछन्। त्यसैगरी उपविजेता हुने टिमले नगद ५० हजार ट्रफी मेडल र प्रमाणपत्र प्राप्त गर्नेछन्। त्यसैगरी विधागत उत्कृष्ट खेलाडीहरूलाई पनि ट्रफी प्रदान गरिने नमुना युथ क्लबका अध्यक्ष रञ्जन श्रेष्ठले जानकारी दिएका छन्।
गरुवा गोल्डकप फुटबल प्रतियोगिताको सम्पूर्ण खेलहरूको गेम अफ नेपालबाट प्रत्यक्ष प्रसारण समेत हेर्न सक्नुहुनेछ।
