देउमाई पौष ९ ।। इलामको देउमाई नगरपालिकामा जारी तेस्रो देउमाई तरुण कप वडास्तरीय फुटबल प्रतियोगिता अन्तर्गत आज भएको पहिलो सेमिफाइनल खेलमा डिफेन्डिङ च्याम्पियन वडा नम्बर २ विजयी हुँदै फाइनल प्रवेश गरेको छ।
अर्को उपाधि दाबेधर मानिएको वडा नम्बर ३लाई ३- २ गोल अन्तरले पराजित गर्दै गत संस्करणको विजेता वडा नं २ तेस्रो संस्करणमा पनि फाइनल प्रवेश गरेको हो। पराजित भएसँगै वडा नम्बर ३ यो प्रतियोगिताबाट बाहिरिएको छ।
देउमाई नगरपालिका वडा नम्बर ४ भानुभक्त माविको छात्रावास खेलमैदानमा आज भएको निकै नै प्रतिस्पर्धात्मक खेलमा अग्रता भने वडा नम्बर ३ ले लिएको थियो। नम्बर ३ का श्याम राईले गोल गर्दै वडा नम्बर ३ लाई अग्रता दिलाएका थिए। तर त्यो अग्रता धेरैबेर टिक्न सकेन राइट साइडबाट बारम्बार मुभ बनाइरहेको वडा नं २ ले अन्तत मुकेश मगरको गोलबाट बराबरी गोल गर्न सफल भयो। वडा नम्बर २ त्यतिमै सीमित रहेन वडा नम्बर ३ लाई बारम्बार दबाबमा राख्दै पुन दोस्रो गोल गर्यो। वडा नम्बर २ का तर्फबाट सुसन मगरले गोल गरेसँगै वडा नम्बर २ ले अग्रता दोब्बर बनाएको हो। त्यसपछि दुवै टिमबाट गोल भएन पहिलो हाफ २-१ को अवस्थामा सकिएको थियो
खेलमा फर्किने रणनीतिका साथ दोस्रो हाफमा मैदान प्रवेश गरेको वडा नम्बर ३ ले केही सुधारिएको प्रदर्शन गर्दै वडा नम्बर २ लाई दबाब राखिरहेको थियो। तर डिबक्सको बाहिरपट्टि पाएको फ्री किकमा शम्भु राईले उत्कृष्ट गोल गर्दै खेल लाइ ३-१ को अवस्थामा पुर्याए त्यसपछि अझै दबाबमा रहेको वडा नं ३ ले अन्तिम अन्तिम समयमा खेलमा फर्किने संकेत भने गरेको थियो ।३ का लागि अनिल राईले दोस्रो गोल गरे।
त्यसपछि कुनै टिमबाट गोल हुन सकेन र डिफेन्डिङ च्याम्पियन वडा नम्बर २ वडा नम्बर ३ लाई पराजित गर्दै फाइनल प्रवेश गर्न सफल भयो।
आजको खेलमा उत्कृष्ट प्रदर्शन गर्दै आफ्नो टिमलाई फाइनल पुर्याउन सफल विजेता टिमका जर्सी नम्बर ८ का शम्भु राई म्यान अफ द म्याच बन्न सफल भए। उनलाई आयोजक समितिका अध्यक्ष बिमलकाजी खम्बु र अतिथि तीर्थ मगरले नगद १००० र ट्रफी प्रदान गरे।
प्रतियोगिता अन्तर्गत भोलि दोस्रो सेमीफाइनल खेल हुनेछ भोलि हुने दोस्रो सेमीफाइनल खेलमा वडा नम्बर ४ र वडा नम्बर १ का बीचमा खेल हुने आयोजक समितिका अध्यक्ष बिमल आजी खम्बुले जानकारी दिए।
हाम्रो गोल लागू औषध विरुद्धको बोल भन्ने मुख्य नाराका साथ स्थानीय स्तरमा रहेका खेलाडीहरूलाई उजागर गर्ने र खेलकुदको माध्यमबाट युवाहरूलाई सही मार्ग निर्देशनमा डोर्याउने उद्देश्य सहित नेपाल तरुण दल देउमाई नगर कमिटीले प्रतियोगिता आयोजना गरेको हो। प्रतियोगिताको फाइनल खेल पौष १२ गते हुनेछ ।
प्रतियोगिताको विजेता टिमले नगद ६० हजारसहित आकर्षक ट्रफी मेडल र प्रमाणपत्र प्राप्त गर्नेछन्। त्यस्तै उपविजेता टिमले नगद ३५ हजार ट्रफी मेडल र प्रमाणपत्र प्राप्त गर्नेछन् । विधागत उत्कृष्ट खेलाडीहरुलाई पनि ट्रफी र नगद पुरस्कार प्रदान गरिने आयोजक समितिका सचिव विनम ढकालले जानकारी दिए।
