बिर्तामोड फागुन १३।। बिर्तामोड नगरपालिका वडा नम्बर ५ र अर्जुनधारा नगरपालिका वडा नम्बर ११ स्थित बसपार्क क्षेत्रको ५१ बिघा जग्गा सम्बन्धी देखिएको विवाद समाधानका लागि सर्वपक्षीय बैठकबाट महत्वपूर्ण निर्णय तथा प्रतिबद्धता सार्वजनिक गरिएको छ। फागुन १३ गते अर्जुनधारा नगरपालिकाको कार्यालयमा सम्पन्न बैठकमा सरोकारवालाहरूबीच संवाद, सहकार्य र कानुनी प्रक्रियामार्फत समस्याको समाधान खोज्ने सहमति बनेको हो।
बैठकले लामो समयदेखि रोक्का रहेको जग्गा सम्बन्धी विषयलाई कानुनी प्रक्रियाबाट टुंग्याउने, प्रभावित नागरिकहरूको माग सम्बोधन गर्ने तथा आगामी निर्वाचनलाई शान्तिपूर्ण, निष्पक्ष र मर्यादित वातावरणमा सम्पन्न गर्न सहयोग गर्ने प्रतिबद्धता जनाएको छ। साथै, बसपार्क क्षेत्र तथा ५१ बिघा क्षेत्रमा राखिएका प्रतिबन्धात्मक सामग्री हटाई लोकतान्त्रिक गतिविधि सञ्चालनमा सहजीकरण गर्ने निर्णय समेत गरिएको छ।
यसै सन्दर्भमा उज्यालो नेपाल पार्टीका झापा क्षेत्र नम्बर २ का उम्मेदवार क्याप्टेन सि के बेघा लिम्बूले सर्वपक्षीय सहमतिको स्वागत गर्दै संवाद र सहकार्य नै दीगो समाधानको आधार भएको बताउनुभएको छ। उहाँले बसोबास गर्दै आएका नागरिकहरूको हक–अधिकारको संरक्षण गर्दै कानुनसम्मत ढंगले समस्या समाधान गरिनुपर्ने धारणा राख्नुभयो।
क्याप्टेन लिम्बूले निर्वाचन लोकतन्त्रको उत्सव भएकाले कसैको अधिकार हनन नहुने गरी शान्तिपूर्ण वातावरण निर्माण गर्नु सबैको साझा दायित्व भएको उल्लेख गर्नुभयो। “हामी विकास, पारदर्शिता र न्यायपूर्ण समाधानका पक्षमा छौं। नागरिकको पीडा सुन्ने र समाधानतर्फ पहल गर्ने प्रतिबद्धता उज्यालो नेपाल पार्टीको मूल एजेन्डा हो,” उहाँले भन्नुभयो।
स्थानीय सरोकारवालाहरूले पनि राजनीतिक दलहरूबीचको सहकार्यले समस्या समाधानतर्फ सकारात्मक सन्देश गएको प्रतिक्रिया दिएका छन्। आगामी दिनमा सम्बन्धित निकायहरूसँग समन्वय गर्दै छिटो, न्यायोचित र व्यवहारिक समाधान निकाल्ने अपेक्षा गरिएको छ।
यस सहमतिले बसपार्क तथा ५१ बिघा क्षेत्रको विवाद समाधानतर्फ नयाँ आशा जगाएको छ भने आगामी निर्वाचनलाई पनि शान्त र सौहार्दपूर्ण वातावरणमा सम्पन्न गर्न मद्दत पुग्ने विश्वास व्यक्त गरिएको छ।