पाँचथर — पाँचथरको फाल्गुनन्द गाउँपालिका वडा नम्बर ३, पौवा सारतापमा रहेको फाल्गुनन्द ग्रीन पिस क्लबको कार्य समिति बैठक सम्पन्न भएको छ। कार्यसमिति बैठकले विभिन्न निर्णयहरू समेत पारित गरेको छ।
क्लबका अध्यक्ष धन प्रसाद नेम्बाङको अध्यक्षतामा बैठक सम्पन्न भएको हो। बैठकले यसपटक नियमित गतिविधिभन्दा फरक सामाजिक कार्यसम्बन्धी महत्वपूर्ण निर्णय समेत गरेको छ। बैठकले सोही वडाका अति विपन्न तथा केही महिनादेखि बिरामी रहेका बुद्ध बहादुर नेम्बाङ (लिले साइला)को आर्थिक अवस्था अत्यन्तै कमजोर भएको जानकारी पाएपछि उपचारका लागि सहयोग गर्ने निर्णय गरिएको हो।
क्लबको निर्णयअनुसार उहाँलाई उपचारका लागि झापाको बिर्तासिटी अस्पताल सम्म पुर्याउन सहयोगस्वरूप नगद रु ५,००० आर्थिक सहायता प्रदान गरिएको छ। कार्यसमितिले निर्णय गरेलगत्तै उक्त रकम बिरामीका आफन्तलाई हस्तान्तरण गरिएको क्लबका सचिव गोपाल घिमिरेले जानकारी दिए।
स्थानीय स्तरमा रहेर खेलकुद तथा सामाजिक गतिविधि सञ्चालन गर्दै आएको क्लबले सामाजिक उत्तरदायित्वअन्तर्गत मानवीय सहयोगको रूपमा उक्त रकम प्रदान गरेको हो। यस कार्यले समुदायमा सहयोग र सहकार्यको भावना थप मजबुत बनाउने अपेक्षा गरिएको छ।