बिर्तामोड बैशाख २४ ।। झापाको बिर्तामोडमा जारी चौथो बिर्तामोड भेट्रान्स फुटबल प्रतियोगितामा आयोजक सेतो र चन्द्रगढी भेट्रान्स फाइनलमा प्रवेश गरेका छन् ।
बिर्तामोड ३ स्थित डोमालाल राजवंशी रंगशालामा आज भएको पहिलो सेमिफाइनल खेलमा आयोजक बिर्तामोड भेट्रान्स निलोलाई १-० गोलले पराजित गर्दै चन्द्रगढी फाइनल प्रवेश गरेको हो । चन्द्रगढीका लागि सुबास खड्काले गरेको गोल नै निर्णायक गोल बन्यो उनले क्याप्टेन प्रेम लिम्बुको क्रसलाई सदुपयोग गर्दै गोल गरेका थिए। ।
खेलमा उत्कृष्ट प्रदर्शन गरेका चन्द्रगढीका गोलकिपर रूपक गुरुङ प्लेयर अफ दी म्याच भए । उनलाई प्रमुख अतिथि बिर्तामोड साना सहरी खानेपानी संस्थाका अध्यक्ष मेघराज बास्तोलाले नगद १५०० र ट्रफी प्रदान गरे।
आजै भएको दोस्रो तथा अन्तिम सेमिफाइनल खेलमा दमक भेट्रान्स क्लबलाई ३-१ गोलले पराजित गर्दै आयोजक सेतोले फाइनलमा चन्द्रगढी भेट्रान्स सँगको भेट पक्का गरेको छ। आयोजकका लागि विशाल राई, भूपेन लिम्बू र कन्या एस गुरुङले गोल गरे।
दमक भेट्रान्सका लागि दिपेन गिरीले पहिलो हाफको इन्जुरी समयमा एक गोल गरेका हुन् । खेलको प्लेयर अफ दी म्याच आयोजक सेतोका विशाल राई भए । उनले नगद १ हजार ५ सय पाए ।
प्रतियोगिताको फाइनल खेल वैशाख २६ गते हुनेछ विजेताले नगद १ लाख एक हजार र उपविजेताले ५१ हजार ट्रफी मेडल र प्रमाणपत्र प्राप्त गर्नेछन्। त्यस्तै विधागत उत्कृष्ट खेलाडीहरूले पनि ट्रफी र नगद पुरस्कार प्राप्त गर्ने आयोजक समितिका अध्यक्ष किरण थापाले जानकारी दिएका छन्।
