बिर्तामोड ।। झापाको बिर्तामोडमा आयोजना हुन लागेको प्रथम उपमेयर कप वडा स्तरीय भलिबल प्रतियोगिता (पुरुष) २०८३ को खेलतालिका सार्वजनिक गरिएको छ ।
वडा नं. ९ खेलकुद विकास समितिको आयोजना तथा बिर्तामोड नगर खेलकुद विकास समितिको सह आयोजनामा सञ्चालन हुने प्रतियोगिता गरामनीस्थित दुर्गा माविको खेलमैदानमा हुनेछ ।
प्रतियोगितामा बिर्तामोड नगरपालिकाभित्रका १० वटा वडाको सहभागिता रहनेछ । सार्वजनिक गरिएको खेल तालिकाअनुसार उद्घाटन खेलमा वडा नं. ९ र वडा नं. १० बीच प्रतिस्पर्धा हुनेछ । उद्घाटन खेल बिहान ९ बजे सुरु हुने तालिका सार्वजनिक गरिएको छ ।
पहिलो दिन प्रारम्भिक चरणका कुल ६ खेल सञ्चालन हुनेछन् । प्रारम्भिक चरण पार गरेका टोलीबीच सोही दिन क्वाटरफाइनल चरणका दुई खेल पनि सञ्चालन हुनेछन् । पहिलो क्वाटरफाइनल दिउँसो २ बजे र दोस्रो क्वाटरफाइनल दिउँसो ३ बजे खेलाइने तालिका रहेको छ ।
प्रतियोगिताको दोस्रो दिन सेमिफाइनल तथा फाइनल खेल सञ्चालन गरिने आयोजकले जनाएको छ ।
खेल तालिकाअनुसार पहिलो सेमिफाइनल ४गते बिहान ९ बजे हुनेछ भने दोस्रो सेमिफाइनल बिहान ११ बजे खेलाइनेछ । प्रतियोगिताको उपाधि भिडन्त अर्थात् फाइनल खेल दिउँसो ३ बजे हुने तालिका सार्वजनिक गरिएको छ ।
प्रतियोगिताको विजेताले नगद १ लाख १सय रुपैयाँ प्राप्त गर्नेछ भने उपविजेताले ५१ हजार १सय रुपैयाँसहित ट्रफी, मेडल र प्रमाणपत्र प्राप्त गर्नेछन् । साथै विभिन्न विधाका उत्कृष्ट खेलाडीहरूलाई समेत नगद पुरस्कार तथा ट्रफी प्रदान गरिने आयोजक समितिका अध्यक्ष विश्वदिप राजवंशीले जानकारी दिए ।
नेपालको राष्ट्रिय खेल भलिबलको प्रवर्द्धन, स्थानीय स्तरका खेलाडीहरूको क्षमता विकास तथा खेलमार्फत सामाजिक एकता र स्थानीय पर्यटन प्रवर्द्धन गर्ने उद्देश्यले प्रतियोगिता आयोजना गरिएको आयोजकको भनाइ छ । प्रतियोगितालाई सफल बनाउन सम्पूर्ण तयारी अन्तिम चरणमा पुगेको समेत आयोजक समितिले जनाएको छ ।
