बिर्तामोड पौष २६ ।। झापा जिल्ला पालिका स्तरीय अन्डर १८ फुटबल प्रतियोगिता २०८२ को खेल तालिक सार्वजनिक भएको छ। तालिका अनुसार उद्घाटन खेल बिर्तामोड नगरपालिका र कमल गाउँपालिकाबीच प्रतिस्पर्धा हुने भएको छ।
शनिश्चरे फुटबल क्लब अर्जुनधारा झापाको आयोजनामा यही माघ ११ गतेदेखि सञ्चालन हुने प्रतियोगिताको खेल तालिका अनिश्चरे सात स्थित खेलमैदानमा पत्रकार सम्मेलन मार्फत आयोजक शनिश्चरे फुटबल क्लबले सार्वजनिक गरेको हो।
प्रतियोगितामा झापाका नौ वटा स्थानीय तहहरूको सहभागिता रहनेछ। झापामा १५ वटा स्थानीय तह रहेपनि अन्य छ स्थानीय तहले भने विविध कारण देखाउँदै प्रतियोगितामा सहभागिता हुन नसक्ने बताएको आयोजक समितिका अध्यक्ष टेकराज तिलिङले जानकारी दिनुभयो प्रतियोगितामा बिर्तामोड नगरपालिका, अर्जुनधारा नगरपालिका, कन्काई नगरपालिका, भद्रपुर,नगरपालिका मेचीनगर नगरपालिका , शिव शताक्षी नगरपालिका ,कमल गाउँपालिका, बुद्ध शान्ति गाउँपालिका,र बारदशी गाउँपालिकाको सहभागिता रहनेछ।
सहभागी टिमलाई दुई समूहमा विभाजन गरिएको छ। समूह ए मा बिर्तामोड नगरपालिका कमल गाउँपालिका शिवशताक्षी नगरपालिका र बुद्धशान्ति गाउँपालिका रहेका छन्। समूह बी मा बारदशी गाउँपालिका, कन्काई नगरपालिका, भद्रपुर नगरपालिका, मेचीनगर नगरपालिका र अर्जुनधारा नगरपालिका रहेका छन्।
“खेलाडी उत्पादन तथा लागू औषध दुर्वेशनी मुक्त समाज ” नाराको साथ फुटबल खेलको माध्यमबाट समाजमा सकारात्मक परिवर्तन ल्याउनका लागि र युवालाई खेलकुदमा प्रेरित गराई लागु औषध जस्ता कुलतबाट टाढा राख्ने उद्देश्य सहित प्रतियोगिता आयोजना गरिएको क्लबका अध्यक्ष तिलिङले जानकारी दिनुभयो
राष्ट्रिय तथा ए डिभिजन क्लबहरूमा आफ्नो छवि बनाइसकेका देवेन्द्र तामाङ पेमा तामाङ जस्ता खेलाडी उत्पादन गरेको शनिश्चरे फुटबल क्लबले विगतका वर्षहरूमा वडा स्तरीय अन्डर १८ प्रतियोगिता सफलताका साथ सम्पन्न गरिसकेको र तेस्रो संस्करणबाट प्रतियोगितालाई क्षेत्र विस्तार गर्दै जिल्लास्तरीय आयोजना गरिएको शनिश्चरे फुटबल क्लबका सचिव हरि गुरुङले जानकारी दिनुभयो
प्रतियोगिता अर्जुनधारा ७ स्थित प्रस्तावित अर्जुनधारा रङ्गशालामा सञ्चालन हुनेछ।
प्रतियोगिताको फाइनल खेल माघ १९ गते हुनेछ। फाइनल विजेताले नगद १ लाख ट्रफी मेडल र प्रमाणपत्र प्राप्त गर्नेछन्। त्यस्तै उपविजेता टिमले नगद ५० हजार ट्रफी मेडल र प्रमाणपत्र प्राप्त गर्नेछन्। त्यसैगरी विधागत उत्कृष्ट खेलाडीहरुलाई पनि ट्रफी प्रदान गरिने आयोजक समितिका अध्यक्ष तिलिङले जानकारी दिनुभयो
खेलतालिका कार्यक्रम शनिश्चरे फुटबल क्लबका अध्यक्ष टेकराज तिलिङको अध्यक्षता तथा जिल्ला खेलकुद विकास समिति अध्यक्ष भेषराज भण्डारी प्रशान्तको प्रमुख आतिथ्यतामा सम्पन्न भएको हो। कार्यक्रममा नगर खेलकुद विकास समितिका अध्यक्ष सुरेन्द्र धिमाल अर्जुनधारा ६ स्थित लक्ष्मी मावि व्यवस्थापन समितिका अध्यक्ष वीरबहादुर राई निर्माण व्यवसायी मिलन बस्नेत तथा झापाका खेल पत्रकारहरूको उपस्थिति रहेको थियो।