झापा ।। प्रथम चाराली गोल्डकप फुटबल प्रतियोगिता आज बाट सुरु भएको छ। उद्घाटन खेलमा दार्जिलिङ एफसीले उत्कृष्ट प्रदर्शनका साथ जित निकाल्दै सेमिफाइनलमा स्थान सुरक्षित गरेको छ ।
शुक्रबार सम्पन्न पहिलो क्वाटरफाइनल खेलमा दार्जिलिङले रेडहर्स फुटबल क्लब इलामलाई ४–० गोल अन्तरले पराजित गर्दै अन्तिम चारको यात्रा तय गरेको हो ।
मेचीनगर–१३ स्थित हातेमालो खेलमैदानमा भएको खेलमा दार्जिलिङ सुरुवातदेखि नै आक्रामक देखिएको थियो । बल पोसेसनदेखि आक्रमणसम्म दबाब बनाएको दार्जिलिङका लागि सलोन थापाले दुई गोल गर्दा प्रिविक घिसिङ र प्रियांसु रानाले समान एक–एक गोल थपे ।
खेलको २१औँ मिनेटमा प्रिविक घिसिङले गोल गर्दै दार्जिलिङलाई अग्रता दिलाए । पेनाल्टी एरियाभित्र प्राप्त अवसरलाई सदुपयोग गर्दै उनले टोलीलाई १–० को अवस्थामा पुर्याएका थिए । पहिलो हाफमा इलामले केही अवसर सिर्जना गरे पनि गोल फर्काउन सकेन ।
दोस्रो हाफमा दार्जिलिङ झनै हाबी बन्यो । ६०औँ मिनेटमा नयन प्रधानको आकर्षक पासमा सलोन थापाले गोल गर्दै अग्रता दोब्बर बनाए । त्यसपछि ८०औँ मिनेटमा प्रियांसु रानाले गोलरक्षक र डिफेन्डरलाई बिट गर्दै शानदार गोल गरेपछि दार्जिलिङ ३–० ले अघि बढ्यो ।
खेलको अतिरिक्त समयको चौथो मिनेटमा प्रियांसु रानाकै असिस्टमा सलोन थापाले व्यक्तिगत दोस्रो गोल गर्दै टोलीलाई ४–० को फराकिलो जित दिलाए ।
खेलमा उत्कृष्ट प्रदर्शन गरेका दार्जिलिङ एफसीका प्रिविक घिसिङ ‘म्यान अफ दि म्याच’ घोषित भए । उनले नगद २ हजार रुपैयाँ प्राप्त गरे ।
प्रतियोगिताको दोस्रो क्वाटरफाइनल खेल शनिबार उर्लाबारी फुटबल क्लब मोरङ र शनिश्चरे एफसी झापाबीच हुने आयोजकले जनाएको छ ।
बज्र स्पोर्ट्स एकेडेमी चाराली झापाको आयोजनामा तथा चाराली युथ क्लबको संयोजनमा सञ्चालन भइरहेको प्रतियोगिताको विजेताले नगद २ लाख रुपैयाँ तथा उपविजेताले नगद १ लाख रुपैयाँ प्राप्त गर्नेछन् । साथै विधागत उत्कृष्ट खेलाडीहरुलाई नगदसहित ट्रफी प्रदान गरिने आयोजकले जनाएको छ ।